नारिता (चिबा), जापान । जापानको प्रमुख अन्तर्राष्ट्रिय नाका नारिता विमानस्थलले यात्रुहरूको सुविधाका लागि एउटा नौलो प्रविधिको परीक्षण सुरु गरेको छ। यात्रुहरूले आफ्नो सामान नअटेर पुराना सुटकेस विमानस्थलमै छोड्ने (फ्याँक्ने) समस्या बढेपछि, कपडाको आकार घटाउने ‘क्लोथिङ कम्प्रेसन मेसिन’ (Clothing Compression Machine) को परीक्षण गरिएको हो।
किन ल्याइयो यो मेसिन? नारिता इन्टरनेसनल एयरपोर्ट कर्पोरेसन (NAA) का अनुसार, पछिल्लो समय जापान आउने पर्यटकको संख्या बढेसँगै विमानस्थलमा बेवारिसे सुटकेसको थुप्रो लाग्ने क्रम बढेको छ।
- तथ्यांक: आर्थिक वर्ष २०२० मा १२४ वटा मात्र बेवारिसे सुटकेस भेटिएकोमा, आर्थिक वर्ष २०२४ मा यो संख्या ८ गुणाले बढेर १०७३पुगेको छ।
- कारण: धेरैजसो यात्रुहरूले किनमेल गरेपछि सामान नअटेर नयाँ र ठूलो सुटकेस किन्ने र पुरानो सुटकेस त्यहीँ छोड्ने गरेका छन्।
कसरी काम गर्छ मेसिनले? टोकियोको गार्मेन्ट कम्पनी ‘एसजोय’ (Sjoy Co.) ले ४ वर्ष लगाएर विकास गरेको यो मेसिन बैंकको एटीएम मेसिन जत्रो छ। १. यस मेसिनमा कपडा राख्ने निश्चित ठाउँ (च्याम्बर) हुन्छ। २. बटन थिचेपछि मेसिनले करिब ३ मिनेटमा कपडालाई खाँदेर (Compress गरेर) सानो बनाइदिन्छ। ३. यसरी खाँदिएको कपडालाई झोलामा धेरै ठाउँ नओगट्ने गरी प्याक गर्न सकिन्छ। घर पुगेर खोल्दा कपडा पुनः पुरानै अवस्थामा फर्किन्छ।
यात्रुको प्रतिक्रिया परीक्षणका क्रममा टोकियोको इताबासी वार्डका एक ३० वर्षीय यात्रुले आफ्ना दुईवटा ज्याकेट मेसिनमा राखेर ‘कम्प्रेस’ गरेका थिए। उनले खुसी हुँदै भने, “ब्याकप्याकमा अब खाली ठाउँ बन्यो। घर जानुअघि म विमानस्थलबाट थप कोसेली (Souvenirs) किन्न सक्ने भएँ।”
भविष्यको योजना विमानस्थल व्यवस्थापनले यो सेवाले सुटकेस बन्द नहुने यात्रुको हैरानी कम गर्ने र पुराना सुटकेस फ्याँक्ने समस्या समाधान हुने विश्वास लिएको छ। हाल परीक्षणका रूपमा रहेको यो सेवालाई भविष्यमा शुल्क तोकेर पूर्ण रूपमा सञ्चालनमा ल्याउने NAA को योजना छ।
(श्रोतः द माइनिची) www.janahitnews.com
