मकवानपुरमा दुईवटा ट्रक आपसमा ठोक्किँदा जलेर नष्ट भएका छन् भने तीनजनाको ज्यान गएको छ।
दुर्घटनामा परी ना ६ ख ६६६७ नम्बरको ट्रकका चालक जिल्ला चितवन राप्ति नगरपालिका ८ का अन्दाजी २८ वर्षीय रिहान रुम्बा, सोही ट्रकका सहचालक जिल्ला गोरखा गण्डकी गाउँपालिका २ गोर्दीटारका अन्दाजी २१ वर्षीय सुमन चेपाङ र ना ६ ख ६३१ नम्बरको ट्रकका सहचालक जिल्ला मकवानपुर मनहरी गाउँपालिका ३ बस्ने अन्दाजी २० वर्षका अमृत प्रजाको मृत्यु भएको जिल्ला प्रहरी कार्यालय मकवानपुरले जनाएको छ।
दुर्घटनामा दुईजना गम्भीर घाइते भएका छन्।
पूर्वपश्चिम राजमार्गअन्तर्गत आज (शनिबार) बिहान पौने २ बजेतिर मकवानपुर मनहरी गाउँपालिका वडा नम्बर ६ नयाँ बस्ती डिपाट गाउँमा दुईवटा ट्रक ठोक्किँदा दुवै ट्रक जलेको जिल्ला प्रहरी कार्यालय (मकवापनुर) का प्रहरी नायब उपरिक्षक टेक बहादुर कार्कीले बताए।
हेटौँडातर्फबाट चितवनतर्फ जाँदै गरेको ना ६ ख ६६६७ नम्बरको ट्रक र विपरीत दिशाबाट आउँदै गरेको ना ६ ख ६३१ नम्बरको ट्रक एकापसमा ठक्कर खाँदा दुवै ट्रकमा आगलागी भएको उनले बताए। (यो समाचार नेपालखबरका लागि सुनिता विष्टलेव लेखेकी हुन ।)
