Screenshot
टोकियो । नेपाल पत्रकार महासंघ जापान शाखाले आफ्नो १५औँ स्थापना दिवसलाई विशेष बनाउँदै पत्रकारहरूको हकहित र सम्मानका लागि महत्वपूर्ण योजनाहरू घोषणा गरेको छ। आगामी मार्च १५ मा मनाइने स्थापना दिवसको अवसरमा महासंघले १० लाख येनको ‘पत्रकार कल्याण कोष’ सञ्चालन गर्ने र ५० हजार रुपैयाँ राशिको ‘प्रवास पत्रकारिता पुरस्कार’ प्रदान गर्ने निर्णय गरेको हो।
शाखाको हालै सम्पन्न दोस्रो नियमित बैठकले गरेका प्रमुख निर्णयहरू यस प्रकार छन्:
१. स्थापना दिवस तथा व्यवस्थापन
स्थापना दिवसलाई भव्य बनाउन सचिव अर्जुन लामिछानेको संयोजकत्वमा एक तयारी उपसमिति गठन गरिएको छ। समितिमा दिनेश थापा, रामचन्द्र गिरी, दुर्गा आचार्य र भवानी भट्ट सदस्य रहेका छन्। यस समितिले कार्यक्रमको सम्पूर्ण स्वरूप र समन्वयको जिम्मेवारी सम्हाल्नेछ।
२. १० लाख येनको पत्रकार कल्याण कोष
प्रवासमा कार्यरत पत्रकारहरूलाई स्वास्थ्य उपचार, आकस्मिक संकट र विपद्का बेला सहयोग पुर्याउने उद्देश्यले १० लाख येनको ‘पत्रकार कल्याण कोष’ स्थापना गरिएको छ। निवर्तमान अध्यक्ष शान्त पहरीको संयोजकत्वमा तयार पारिएको कार्यविधिलाई आवश्यक संशोधन सहित बैठकले पारित गरेको हो। कोषलाई बलियो बनाउन जापानस्थित नेपाली संघ–संस्था, व्यवसायी र शुभेच्छुकहरूसँग सहयोगको आह्वान समेत गरिएको छ।
३. प्रवास पत्रकारिता पुरस्कारको स्थापना
प्रवासमा रहेर नेपाली पत्रकारितामा विशिष्ट योगदान पुर्याउने पत्रकारलाई सम्मान गर्न ५० हजार रुपैयाँ राशिको ‘प्रवास पत्रकारिता पुरस्कार’ स्थापना गरिएको छ। पुरस्कारलाई पारदर्शी बनाउन खगराज गौतमको संयोजकत्वमा दिनेश कुमार थपलिया र इन्दिरा खनाल सदस्य रहेको कार्यविधि निर्माण समिति गठन गरिएको छ।
४. लेखन तथा बौद्धिक विमर्श
जापानमा रहेका नेपाली समुदायका समस्या र गतिविधिलाई तथ्यपरक ढङ्गले उजागर गर्न विज्ञहरूबाट लेख-रचना संकलन गरी प्रकाशन गरिने भएको छ। सामग्री सम्पादनका लागि उपाध्यक्ष मनिषा चम्लागाईंको संयोजकत्वमा फुर्वा शेर्पा र भुवन भण्डारी सदस्य रहेको सम्पादन मण्डल गठन गरिएको छ।
५. अन्य सिर्जनात्मक पहलहरू
महासंघले डिजिटल उपस्थिति बलियो बनाउन आधिकारिक फेसबुक पेजमार्फत जनचेतनामूलक सामग्री प्रकाशन गर्ने र गुगल फर्ममार्फत सदस्यहरूको सुझाव संकलन गर्ने निर्णय गरेको छ। साथै, आगामी दिनमा ‘प्रवास पत्रकारिता ग्लोबल सम्मेलन’ आयोजना गर्न पहल गर्ने लक्ष्य समेत राखिएको छ।
शाखाले चालेका यी कदमहरूले जापानमा नेपाली पत्रकारिताको व्यावसायिक विकास, पत्रकारहरूको सुरक्षा र पेशागत मर्यादालाई नयाँ उचाइमा पुर्याउने विश्वास गरिएको छ।
