टोकियो। जापानका विभिन्न क्षेत्रहरूमा चिसो बढेसँगै जनजीवन प्रभावित भएको छ। १३ तारिख (आज) पूर्वी र उत्तरी जापानका अधिकांश भागमा तापक्रम १० डिग्री सेल्सियसभन्दा कम रहने अनुमान गरिएको छ। कतिपय स्थानमा बिहानै यस वर्षकै सबैभन्दा बढी चिसो महसुस भएको छ।
जापानको मौसम विज्ञान एजेन्सी (JMA) का अनुसार, टोकियो महानगर क्षेत्रमा पनि बिहान सबेरै तापक्रम घटेको छ।
- हाचिओजी शहरमा तापक्रम −3.1∘C (शून्यभन्दा ३.१ डिग्री सेल्सियस तल) र ओकुटामा शहरमा −1.9∘C रेकर्ड गरिएको छ, जुन यस वर्षको सबैभन्दा कम हो।
- इबाराकी प्रिफेक्चरमा समेत १४ मध्ये ६ वटा अवलोकन केन्द्रमा बिहानै यस वर्षको सबैभन्दा कम तापक्रम रेकर्ड गरिएको छ, जसले देशभर कडा चिसोको सङ्केत गर्दछ।
उत्तरी जापानमा मौसम बिग्रने चेतावनी
JMA ले आगामी १४ र १५ तारिख मा उत्तरी जापान र होकुरिकु क्षेत्रमा मौसम अत्यन्तै खराब हुने भन्दै सतर्क रहन आग्रह गरेको छ।
- ठूलो हिमआँधी (Blizzard), आँधीबेहरी र उच्च लहर (Heavy Waves) को खतरा रहेको भन्दै सर्वसाधारणलाई विशेष सावधानी अपनाउन आह्वान गरिएको छ। उत्तरी जापानका केही स्थानमा ‘महासघन हिमआँधी’ आउने सम्भावना रहेको छ।
- हावापानी विभागको पूर्वानुमानअनुसार, १४ तारिखमा टोकियो र तोहोकु क्षेत्रलगायतका स्थानहरूमा वर्षा हुने सम्भावना छ।
- १३ तारिख साँझ ५ बजेसम्मको पूर्वानुमानअनुसार, टोकियोको सहरी क्षेत्र र सेन्डाईमा अधिकतम तापक्रम 11∘C रहने अनुमान छ।
यातायातमा अवरोधको जोखिम
विशेषगरी होक्काइडो क्षेत्र मा १५ तारिखको साँझ ६ बजेसम्मको २४ घण्टाको अवधिमा ७० सेन्टिमिटरसम्म हिउँ पर्न सक्ने अनुमान गरिएको छ।
JMA ले भारी हिउँपातका कारण यातायात र सञ्चार सेवामा अवरोध पुग्न सक्ने भएकाले यात्रा गर्दा सावधानी अपनाउन सबैलाई आग्रह गरेको छ।
