गलकोट समाज जापान क्षेत्रीय समिति टोकियोले नेपाली नारीहरुको पर्व हरितालिका तिजको अबसरमा “तीज धमाका २०२४” आयोजना गर्ने भएको छ।
वार्षिक रुपमा मनाउदै आएको हिन्दू नेपाली महिलाहरुको पर्व ‘हरितालिका तिज’ लाई यस वर्ष पनि एक कार्यक्रमका साथ मनाउन लागिएको अध्यक्ष दिनेश थापाले जानकारी गराए। नेपालबाट आमन्त्रित लोक दोहोरी तथा तिज गितमा विशेष रुपमा ख्याती प्राप्त राष्ट्रिय कलाकार गायिका द्वय सुनिता बुढा क्षेत्री, सम्झना लामिछाने मगर र जापानमा कर्मथलो तथा परदेशी गायकबाट आफ्नो परिचय स्थापित गरेका गायक सूर्य खड्का साथै स्थानीय कलाकारहरुको प्रस्तुती रहने अध्यक्ष थापाले बताए ।
चाडपर्वको अवरसरमा आयोजना गरिने कार्यक्रमले हामी विदेशी भुमिमा रहेका नेपाली दाजुभाइ तथा दिदीबहिनीहरुका बिचमा आपसी भाईचारा, सद्भाव र एकता क़ायम गर्नुको साथै कला र संस्कृतिको संरक्षण तथा नया पुस्ताका लागि एउटा पाठशाला हुने अध्यक्ष थापाको भनाइ छ ।
कार्यक्रमलाई भव्य बनाउनको लागि नेपालबाट आमन्त्रित कलाकारको भिषाका लागि आवश्यक डकुमेन्ट्रेसनको प्रकृयामा रहेको र कार्यक्रम २०२४-सेप्टेम्बर ४ तारिक बुधवारका दिन नेपालीहरुको बाक्लो बसोबास रहेको टोकियोको ईकेगामी हलमा हुने जानकारी कार्यक्रम संयोजक तथा संस्थाका वरिष्ठ उपाध्यक्ष ईश्वर बस्नेतले जानकारी गराए। विभिन्न बाध्यताले गर्दा हामी विदेशमा छौ तर हामी संसारको जुनकुनै स्थानमा रहे पनि हामी हाम्रो धर्म, कला र संस्कृति पटक्कै भुल्न सक्दैन सोहि अनुरूप विशेष गरि हरितालिका तिज हिन्दु नेपाली नारीहरुको महान पर्व रहेको र यस पर्वमा विवाहित नारीहरु माईत जाने प्रचलन रहेको हुदा विदेशमा रहेका महिला दिदीबहिनीहरुलाई आफ्नै माईतको आगनमा पुगेर वर्षभरिका पिडा र बेदना भुलाएको महशुष हुने गरि कार्यक्रमको आयोजना गर्न लागेको वरिष्ठ उपाध्यक्ष बस्नेतको भनाई छ।
नेपाली महिला हरुको पर्व तिज कार्यक्रमलाई नेपाल कै अनुभुति हुने गरि यस पटकको तिज धमाका २०२४ आयोजना गर्न लागेको र सोहि अनुसार आन्तरिक तयारी सुरुवात गरेको सचिव पवन बोहोरा क्षेत्रीले जानकारी दिए। विगतका वर्षहरुमा जस्तै यस पटक पनि टोकियोबासी नेपाली दाजुभाई दिदीबहिनीहरुले कार्यक्रमलाई भव्य रुपमा सफल पार्नु हुनेमा कान्तो समिति पूर्ण रूपमा विस्वस्त रहेको बताउदै बिदेशी भूमिमा बर्ष भरिको थकान मेटाउन र आफ्नो नातागोता ,साथी भाइहरुको भेटघाटको साथै नेपालबाट आमन्त्रित ख्याती प्राप्त कलाकारको बिचमा छमछमी नाचेर समेत रमाइलो गर्नको लागि सम्पूर्ण जापानी बासीहरुलाई आजैदेखि उक्त दिनको लागि बिदा मिलाउनु हुन समेत सचिव बोहोराले अनुरोध गरेका छन।
