टोकियो, जापान सरकारले केयरगिभर (Kaigo – स्याहारसुसार) र अपाङ्गता भएका व्यक्तिहरूको कल्याणकारी क्षेत्रमा कार्यरत कर्मचारीहरूको तलबमा उल्लेख्य वृद्धि गर्ने नीति तय गरेको छ। जनशक्ति अभावको समस्या समाधान गर्न र अन्य उद्योग सरहको सेवा सुविधा बनाउन सरकारले तलब बढाउने निर्णय गरेको हो।
सरकारी अधिकारीहरूले २२ तारिखमा दिएको जानकारी अनुसार, यो नयाँ तलब वृद्धि सन् २०२६ को जुन महिनादेखि लागू हुनेछ।
मुख्य विशेषताहरू:
- तलब वृद्धि रकम: केयरगिभर (Elderly Care) र अपाङ्गता स्याहार केन्द्र (Disability Welfare) मा काम गर्ने कर्मचारीहरूको मासिक तलबमा अधिकतम १९,००० येन (करिब १७ हजार नेपाली रुपैयाँ) सम्म वृद्धि गरिनेछ।
- लागू हुने समय: यो व्यवस्था आगामी आर्थिक वर्ष अर्थात् सन् २०२६ को जुन महिनादेखि कार्यान्वयनमा आउनेछ।
- उद्देश्य: जापानका अन्य उद्योगहरूको तुलनामा केयरगिभर क्षेत्रको तलब कम हुँदा कामदारहरू आकर्षित नभएको र जनशक्ति अभाव भएको निष्कर्ष निकाल्दै, सरकारले तलबको अन्तर (Wage Gap) कम गर्न यो कदम चालेको हो।
बजेट व्यवस्थापन कसरी गरिदैछ?
कर्मचारीको तलब बढाउनका लागि सरकारले सम्बन्धित संस्थाहरूलाई दिने सरकारी अनुदान (Remuneration) मा वृद्धि गर्ने भएको छ।
- ज्येष्ठ नागरिक स्याहार (Nursing Care) संस्थाहरूका लागि: २.०३ प्रतिशत वृद्धि।
- अपाङ्गता कल्याण (Disability Welfare) संस्थाहरूका लागि: १.८४ प्रतिशत वृद्धि।
यसका लागि अर्थमन्त्री सात्सुकी खातायामा र स्वास्थ्य, श्रम तथा कल्याण मन्त्री केनिचिरो उएनोबीच २४ तारिखमा हुने विशेष छलफलपछि औपचारिक निर्णय गरिने बताइएको छ।
नेपाली कामदारलाई फाइदा
जापानमा ‘तोकुतेइ गिनो’ (SSW) तथा अन्य भिसामा केयरगिभरको रूपमा काम गर्ने हजारौं नेपालीहरू यो निर्णयबाट प्रत्यक्ष लाभान्वित हुनेछन्। कामको चाप अनुसार तलब कम भएको गुनासो आइरहेको बेला मासिक १९ हजार येनको वृद्धिले कामदारहरूलाई ठूलो राहत मिल्ने अपेक्षा गरिएको छ।
