८८ दिनपछि बल्ल प्रधानमन्त्री शेरबहादुर देउवा नेतृत्वको गठबन्धन सरकारले पूर्ण आकारको मन्त्रिपरिषद् विस्तार आज गर्दैछ ।
गठबन्धनमा बिहीबार बनेको सहमतिअनुसार आज मन्त्रिपरिषद् विस्तार हुँदैछ । मन्त्रीको शपथ अपराह्न ४ बजे गर्ने तयारी छ । त्यसअघि नेपाली कांग्रेस, नेकपा एकीकृत समाजवादी र जनता समाजवादीले मन्त्री हुनेको नाम टुंग्याउँदैछन् ।
मन्त्रिपरिषदमा गठबन्धनको पाँच घटकमध्ये चार घटक समेटिने छन् । सत्ता नेतृत्व दल कांग्रेस, माओवादी, नेकपा एकीकृत समाजवादी र जनता समाजवादी पार्टी (जसपा) सम्मिलित मन्त्रिपरिषद् विस्तार हुने भएको हो । राष्ट्रिय जनमोर्चाको समर्थन मात्रै रहने छ ।
प्रमुख विपक्षी दलले मात्रै होइन, सत्ता गठबन्धनभित्रै मन्त्रिपरिषद् विस्तार हुन नसकेकोप्रति आलोचना हुँदै आएको थियो ।
बालुवाटारमा बिहीबार भएको सहमितअनुसार कांग्रेसले ८, माओवादी केन्द्रले ५, जसपा र नेकपा एकीकृत समाजवादीले ४–४ मन्त्रालय पाउने छन् ।
राजनीतिक दलसम्बन्धी अध्यादेश निस्क्रीय कि फिर्ता भन्ने विवादले शुरुवातमा मन्त्रिपरिषद विस्तारमा ढिलाई भएकोमा पछिल्लो पटक मन्त्रालय भागवण्डाले गठबन्धनमा सकस भएको थियो ।
मन्त्रालय भागबण्डामा असन्तुष्टि जनाएको नेकपा एकीकृत समाजवादीले दुई राज्यमन्त्रीसहित ४ मन्त्रालय र २ मुख्यमन्त्री पाउने भएपछि उसको असन्तुष्टि हटेको छ । समाजवादीलाई शहरी विकास, संस्कृति तथा पर्यटन र श्रम तथा रोजगार मन्त्रालय दिइएको छ ।
जसपाले भौतिक पुर्वाधार तथा यातायात, कृषि तथा पशुपन्छी, संघीय मामिला तथा सामान्य प्रशासन र बन तथा वातावरण पाउने भएको छ ।
कांग्रेसले प्रधानमन्त्रीसहित रक्षा, गृह, परराष्ट्र, सञ्चार तथा सूचना प्रविधिसहितका मन्त्रालय पाएको छ ।
नेकपा माओवादी केन्द्रले अर्थ, ऊर्जा, शिक्षा, विज्ञान तथा प्रविधि, भूमि व्यवस्था तथा गरिबी निवारण र खानेपानी मन्त्रालय पाएको छ ।
असार २९ गते गठबन्धनबाट प्रधानमन्त्री बनेका देउवाले ८८ दिनसम्म पाँच मन्त्री र एक राज्यमन्त्रीका भरमा सरकार चलाउदै आएका थिए ।
यी सांसदहरू बन्दैछन् मन्त्री
२० असोजमा माओवादीबाट मन्त्रीका लागि देबेन्द्र पौडेल, शशी श्रेष्ठ, महेश्वरजंग गहतराध र बोधमाया यादव छनोट । पौडेलले शिक्षा, शशीले भूमि सुधार, महेश्वरजंगले खानेपानी मन्त्रालय सम्हाल्ने चर्चा । बोधमायाको टुंगिन बाँकी
नेपाली कांग्रेसबाट डा. मिनेन्द्र रिजाल रक्षा, दिलेन्द्रप्रसाद बढु कानुनमन्त्री बन्ने निश्चित, उमाकान्त चौधरीको टुंगिन बाँकी
नेकपा (एस) बाट रामकुमारी झाँक्री स्वास्थ्य, विरोध खतिवडा सहरी विकास, किसान श्रेष्ठ श्रम तथा रोजगार, प्रेम आले पर्यटन र भवानी खापुङ राज्यमन्त्री बन्ने
जसपामन्त्री बन्नेहरूमा राजेन्द्र श्रेष्ठ, रेणु यादव, रामसहाय यादव र प्रमोद साह मन्त्री बन्ने भएका छन
