राजकुमारी काकोले लगाएको ‘इयररिङ’ को चर्चा: अपाङ्गता भएका व्यक्तिहरूले बनाएको उत्पादनको बिक्री १०० गुणा बढ्यो

तोत्तोरी, जापान, जापानी राजपरिवारकी कान्छी छोरी राजकुमारी काकोले आफ्नो तोत्तोरी भ्रमणका क्रममा लगाएको एक जोर ‘इयररिङ’ (Earrings) ले अहिले जापानी बजारमा तहल्का मच्चाएको छ।

सन् २०२५ को सेप्टेम्बरमा भएको भ्रमणका क्रममा राजकुमारी काकोले लगाएको उक्त इयररिङ कुनै महँगो लक्जरी ब्रान्डको नभई, तोत्तोरी प्रिफेक्चरको साकाइमिनातो सहरमा रहेको अपाङ्गता भएका व्यक्तिहरूको रोजगार सहयोग केन्द्र ‘हामायु’ (Hamayu) का सदस्यहरूले हातैले बनाएको उत्पादन थियो।

१३० गुणाले बढ्यो बिक्री

‘हामायु’ का अनुसार, राजकुमारीले उक्त इयररिङ लगाएको तस्बिर सार्वजनिक हुनासाथ अर्डरको ओइरो लागेको छ।

• अनलाइन अर्डर: पहिले फाट्टफुट्ट मात्र बिक्री हुने पसलमा अचानक १०० भन्दा बढी अनलाइन अर्डरहरू आए।
• कुल बिक्री: सामान्य समयको तुलनामा अहिले बिक्री १३० गुणा (130 times) ले बढेको छ।
• उत्पादन: १९ जना स्टाफ (१० देखि ५० वर्ष उमेर समूहका) ले मिलेर बनाउने यी गहनाहरूको माग अहिले यति धेरै छ कि उत्पादन गर्न भ्याइनभ्याइ भएको छ।

कसरी बन्यो यो इयररिङ?

यो इयररिङ ‘सिप्पो-याकी’ (Shippo-yaki) नामक परम्परागत जापानी विधिबाट बनाइएको हो। जसमा धातुमा सिसाको लेप (Glaze) लगाएर उच्च तापक्रममा पकाइन्छ। यो पूर्ण रूपमा ‘ह्यान्डमेड’ हो।

संस्थालाई नै थाहा थिएन

रोचक कुरा के छ भने, राजकुमारी काकोले आफ्नो उत्पादन प्रयोग गर्दैछिन् भन्ने कुरा ‘हामायु’ का स्टाफलाई थाहा थिएन। दरबार (Imperial Household Agency) बाट कुनै पूर्व जानकारी आएको थिएन। संस्थाकी प्रतिनिधि नोरिको वाकाहाराले भनिन्, “जब सहरको नगरपालिका (City Hall) बाट फोन आयो कि ‘राजकुमारीले तपाइँहरूको इयररिङ लगाउनुभएको छ’, हामी त छक्क पर्यौं। यो हाम्रो लागि ठूलो सरप्राइज र खुसीको कुरा थियो।”

पहिरन कूटनीति र सन्देश

सेप्टेम्बर १३ मा कुरायोसी सहरमा आयोजित ‘राष्ट्रिय हाई स्कुल साङ्केतिक भाषा (Sign Language) प्रतियोगिता’ मा सहभागी हुन जाँदा राजकुमारीले पहिलो दिन गुलाबी रङको वनपिससँग मिल्ने गरी सोही रङको इयररिङ लगाएकी थिइन्।

दोस्रो दिन भने उनले तोत्तोरी सहरकै अर्को एक कम्पनीले ‘वाशी’ (जापानी कागज) र इन्डिगो डाई प्रयोग गरेर बनाएको निलो इयररिङ लगाएकी थिइन्। स्थानीय उत्पादन र सामाजिक कार्यमा संलग्न संस्थाहरूको उत्पादन प्रयोग गरेर उनले अप्रत्यक्ष रूपमा ठूलो सहयोग पुर्‍याएको चर्चा भइरहेको छ।

प्रतिनिधि वाकाहाराले भनिन्, “म चाहन्छु कि मानिसहरूले बुझून्— अपाङ्गता भएका व्यक्तिहरूले पनि यति सुन्दर वस्तुहरू बनाउन सक्छन्।”