नेपालबाट कलाकारहरुको बाक्लो संख्यामा उपस्थित भई बिभिन्न सांगीतिक कार्यक्रमहरु बाक्ळै हुने गरेको जापानमा अनेसास जापानले भने एक पृथक कार्यक्रमको आयोजना गरेको छ ।
जापानमा पहिलो पल्ट नेपाली गजलका प्रणयता मोतीराम भट्टको १५९ औ जन्म जयन्तीको अवसरमा नेपाली युवा पुस्ताका गजल हस्ती प्रदीप रोदन को साथमा गजल साँझ -२०२४ को आयोजन गरिएको छ । आगामी अगष्ट ३१ तारीक टोकियो ओकोबू स्थित R’s Art court हलमा ३ बजेबाट , सेप्टम्बर ४ तारीक ओशाका स्थित जिग्री दोहोरी साँझ र सेप्टम्बर ८ तारीक नागोया फुसीमी स्थित दैलो रेष्टूरेण्टमा साँझ ४ बजे बाट कार्यक्रम हुने अनेसास जापानका अध्यक्ष अरुण पौडेलले जानकारी दिएका छन ।
गजल भन्ने बितिकै प्रायः प्रणय भाव हुने भएकोले पनि गजल साँझ हामी नेपाली बिचमा आत्मीयताको साँझको रूपमा साहित्यिक मनहरुलाई जोड़न कोशेढुंगा साबित हुने अनेसास जापानका निवर्तमान अध्यक्ष रविन शर्मा बताउछन ।
युवा पुस्ता माझ निकै लोकप्रिय ग़ज़लकार प्रदीप रोदन समाजका बिकृति बिसंगती देखी राजनीति सम्म प्रेम प्रणयदेखि बिछोड़का पीड़ाहरुलाई ग़ज़ल मार्फ़त पोख्ने गर्छन । जापानमा पहिलो पल्ट बिभिन्न शहरहरुमा हुन गईरहेको यस कार्यक्रममा आफुलाई उपयुक्त हुने स्थानमा उपस्थित भई सफल बनाउन जापानबासी सम्पूर्ण साहित्यिक मनहरुमा अनेसास जापान ले हार्दिक अपील गरेको छ ।
