नयाँ कोरोनाभाइरस संक्रमणको लागि गरिएको सिमा फुकुवाको अर्को उपाय अन्तरगत अब नेपालसहितका सिंगापुर, म्यानमार, मंगोलियाबाट जापान आउने यात्रुले तीन दिनसम्म एयरपोर्टको क्वारिन्टाइन बस्नु नपर्ने भएको छ ।
मार्च २६ तारिकदेखि लागु हुने गरि शुक्रवार विदेश मन्त्रालयले आफ़नो वेभसाइटमार्फत जारी गरेको सूचना अनुसार बुस्टर खोप (3rd dose) लगाएको प्रमाण भए होम क्वारिन्टाइन पनि बस्नु नपर्ने अन्यथा ७ दिन होम क्वारेन्टिन भने बस्नु पर्ने उल्लेख गरिएको छ ।
बुस्टर खोप (3rd dose) नलगाएका हरूको हकमा जापान प्रवेश गरेको ३ दिन पछि पिसिआर रिपोर्ट नेगेटिभ भएको डकुमेन्ट अनलाइनमार्फत स्वास्थ्य, श्रम र कल्याण मन्त्रालयलाई सूचित गरेमा पनि होम क्वारिन्टाइन सोही दिनबाट क्वारिन्टाइन अन्त्य गरिन सकिने छ ।एयरपोर्टबाट घरसम्म जान सार्वजानिक यातायात प्रयोग गर्न समेत मिल्ने भएको छ।
जापान सरकारले कोरोना रोकथामका उपाय अवलम्बन गर्दै सामाजिक र आर्थिक गतिविधिलाई बढ़ावा दिने बताईरहेका बेला यस खालका निर्णयहरू सार्वजनिक हुन थालेक़ा छन । यसबाट जापान प्रवेशका लागि तयारीमा रहेका हजारौ विदेशी नागरिकलाई थप सहज हुने अपेक्षा गरिएको छ ।
त्यसैगरि जापानमा पछिल्लो समयमा कोभिडको संक्रमण बढ्दै गएपछि यसका विरुद्ध अपनाउनुपर्ने मापदण्डका रुपमा प्रतिबन्धहरु लगाईदै आएका यहाँका ४७ प्रिफेक्चरमध्ये १८ वटाका यस्ता प्रतिबन्धहरुलाई गत मंगलबारदेखि पूर्णरूपमा हटाएको छ । यसरी प्रतिबन्धहरु हटाइएका प्रिफेक्चरहरुमा टोकियो र ओसाका पनि रहेका छन् । यहाँ गएको जनवरी ८ देखि यस्ता प्रतिबन्धहरु लगाइएको थियो ।
यहाँका नागरिकलाई सार्वजनिक स्थलमा धेरै जम्मा हुन तथा होटल , रेस्टुरेन्टहरु सञ्चालन गर्न पनि सीमित संख्याका ग्राहकमा मात्र दिइएको थियो । तर अहिले ती सबै प्रतिबन्ध हटाइएको छ । यहाँ अब नागरिकहरु ठुलो संख्यामा जम्मा हुने र आफ्ना व्यवसायहरु सञ्चालन गर्न पाउने भएका छन् ।
जापानको अध्यागमन सेवा एजेन्सीका अनुसार जनवरी ४ सम्म ४ लाख ७ हजार भन्दा बढी व्यक्तिहरू जापान प्रवेशको भिसाका लागि योग्य भएर पनि सिमा नियन्त्रणमा गरिएको कडाइसंगै प्रवेश गर्न असमर्थ भएका थिए । यी मध्य मध्ये १,५२,९०० विद्यार्थी रहेका छन ।
