🔅सुस्ता दुख्छ कालापानी दुख्छ🔅

पुर्खाले बचाएको सम्पदा सुस्ताको कहानी दुख्छ ,
बैमान छिमेकीले नग्रा गाडेको कालापानी दुख्छ।

फितलो नितीमा त्वम शरणको लाचारी छ सधै,
पुस्तौसम्म नभुलिने त्यो नतमस्त आनीबानी दुख्छ।

सिमा मिचिदा शासक बोल्दैन किन मुख खोल्दैन,
अन्धा कुर्शीवालको धन्दाको दुखद कहानी दुख्छ।

स्वाधिनता बसाई सरेर,स्वतन्त्रता बन्धक भा बेला,
सधै सधै बेसरम यी शासकहरुका तथानामी दुख्छ ।

हो छिमेकी हेपाहा मिचाहा छ सिमाहरु भाचिरहन्छ,
लिम्पियाधुरा र टनकपुर माथीको मनोमानी दुख्छ ।

सांधहरु सारेको बेला नाकावन्दीमा पारेको बेला,
बिस्तारबादीका नाजायज हर्कतहरु र हैरानी दुख्छ ।

पानी विनै नालापानी जितेका सन्ततिहरुलाई,
शासकका स्वार्थका लेनदेनका नादानी दुख्छ।