जापानी मन्त्रिपरिषद् कार्यालयले चिनियाँ प्रविधि कम्पनी तथा टिकटकको सञ्चालक ‘बाइटडान्स’ माथि प्रतिलिपि अधिकार कानुन (Copyright Law) उल्लङ्घनको आशंकामा अनुसन्धान सुरु गरेको छ।
हालै सामाजिक सञ्जालमा जापानी प्रधानमन्त्री सानाए ताकाइची र लोकप्रिय जापानी एनिमे पात्रहरूको एआई (आर्टिफिसियल इन्टेलिजेन्स) द्वारा सिर्जित भिडियोहरू व्यापक रूपमा फैलिएपछि जापान सरकारले शुक्रबारदेखि यो कदम चालेको हो।
सरकारी अधिकारीहरूका अनुसार, बाइटडान्सले यसै महिनाको सुरुमा चीनमा सीमित रूपमा सार्वजनिक गरेको आफ्नै नयाँ भिडियो जेनेरेटिभ एआईको प्रयोग गरी अनुमति बिना यी सामग्रीहरू तयार पारिएको विश्वास गरिएको छ। विशेष गरी ‘अल्ट्राम्यान’ सिरिज, चर्चित मान्गा ‘डिटेक्टिभ कोनान’ का पात्रहरू र प्रधानमन्त्री ताकाइचीका नक्कली भिडियोहरू टिकटक र एक्स (ट्विटर) मा मंगलबारदेखि भाइरल भइरहेका छन्।
शुक्रबार मन्त्रिपरिषद्को बैठकपछि आयोजित पत्रकार सम्मेलनमा जापानकी आर्थिक सुरक्षा मन्त्री किमी ओनोदाले यस विषयमा गम्भीर आपत्ति जनाएकी छिन्। उनले भनिन्, “प्रतिलिपि अधिकार धनीको अनुमति बिना सामग्रीको प्रयोग भइरहेको अवस्थालाई हामी नजरअन्दाज गर्न सक्दैनौं।” सरकारले बाइटडान्सको जापानी शाखालाई यस विषयमा तत्काल जवाफ दिन र समस्या समाधानका उपायहरू पेस गर्न कडा निर्देशन दिएको छ।
यता बाइटडान्सको जापानी सहायक कम्पनीले प्रश्न उठाइएका भिडियोहरू अस्तित्वमा रहेको पुष्टि गरेको छ। कम्पनीले योमिउरी सिम्बुनलाई प्रतिक्रिया दिँदै आफूहरूले यस विषयमा आवश्यक कारबाही अगाडि बढाइरहेको जनाएको छ। एआई प्रविधिको दुरुपयोग गरी सिर्जना गरिने यस्ता सामग्रीले बौद्धिक सम्पत्तिमाथि चुनौती थपेको भन्दै जापानमा चिन्ता व्यक्त गरिएको छ।
