टोकियो (जापान) – जापानको उच्च शिक्षामा शैक्षिक नैतिकताको गम्भीर उल्लंघन भएको घटना बाहिर आएको छ। जापानको शीर्ष निजी विश्वविद्यालयहरूमध्ये एक मानिने वासेदा विश्वविद्यालय (Waseda University) ले प्रवेश परीक्षामा नक्कली अंग्रेजी भाषा परीक्षणको प्राप्तांक (Score) पेश गरेको भन्दै आफ्ना विद्यार्थीहरूमाथि कडा कारबाही गरेको छ।
विश्वविद्यालयको वेबसाइटमा मंगलबार सार्वजनिक सूचना अनुसार, ५ जना स्नातक तहका विद्यार्थीहरूको भर्ना खारेज (Revoked) गरिएको छ भने भर्नाको प्रक्रियामा रहेका अन्य ३ जनाको प्रवेश अनुमति रद्द गरिएको छ।
के हो घटना?
यो कारबाही TOEIC (Test of English for International Communication) को नतिजामा भएको संगठित ठगीसँग सम्बन्धित छ। गत वर्ष चिनियाँ स्नातक विद्यार्थीहरू र अन्य व्यक्तिहरू यस परीक्षामा संगठित रूपमा चिटिङ र नक्कली नतिजा बनाउने कार्यमा संलग्न भएको तथ्य बाहिर आएको थियो।
अन्तर्राष्ट्रिय व्यापार सञ्चार संस्थान (Institute for International Business Communication), जसले यो अंग्रेजी परीक्षा सञ्चालन गर्छ, ले गत जुलाईमा ठगीमा संलग्न भएको आशंकामा मे २०२३ देखि जुन २०२५ सम्मका ८०३ जना परीक्षार्थीको नतिजा रद्द गरिने घोषणा गरेको थियो।
वासेदाको अनुसन्धानले के देखायो?
वासेदा विश्वविद्यालयले गरेको आन्तरिक अनुसन्धानका क्रममा स्नातक र स्नाकोत्तर तहको प्रवेश परीक्षामा ५२ जना आवेदकले त्यस्ता रद्द गरिएका (Invalidated) नतिजाहरू पेश गरेको फेला पारेको थियो।
• ती ५२ जनामध्ये ४४ जना आवेदकहरू प्रवेश परीक्षामा पहिले नै असफल भइसकेका थिए।
• भर्ना भइसकेका एक जना स्नातक तहका विद्यार्थीलाई भने अनिश्चितकालका लागि निलम्बन (Indefinite suspension) गरिएको छ।
अन्य विश्वविद्यालयमा पनि कारबाही
नक्कली कागजात पेश गर्ने विद्यार्थीमाथि कारबाही गर्नेमा वासेदा विश्वविद्यालय मात्र एक्लो छैन। जापानको प्रतिष्ठित सार्वजनिक विश्वविद्यालय युनिभर्सिटी अफ सुकुबा (University of Tsukuba) र निजी क्षेत्रको टोकियो युनिभर्सिटी अफ साइन्स (Tokyo University of Science) ले पनि नक्कली TOEIC स्कोरका कारण ग्राजुएट स्कूलको भर्ना वा अफरहरू रद्द गरेको घोषणा गरिसकेका छन्।
यो घटनाले जापानमा उच्च शिक्षाका लागि आवेदन दिने विद्यार्थीहरूलाई शैक्षिक प्रमाणपत्र र भाषायोग्यताका कागजातहरू सक्कल र विश्वसनीय हुनुपर्छ भन्ने कडा सन्देश दिएको छ।
तपाईंलाई यो जानकारी कस्तो लाग्यो? जापानको शैक्षिक र रोजगारसम्बन्धी अपडेटका लागि जनहित न्युज हेर्दै गर्नुहोला।
श्रोतः क्योदो न्युज (Kyodo News)
