मुगुमा भएको बस दुर्घटनामा मृत्यु हुनेको संख्या ३२ पुगेको छ। २४ जनाको घटनास्थलमै, ४ जनाको उद्धार गरी ताल्चा विमानस्थल पुर्याउने क्रममा र नेपालगञ्ज पुर्याएका थप ४ जनाको मृत्यु भएको कर्णाली प्रदेश प्रहरी कार्यालयका प्रहरी निरीक्षक जीवन लामिछानेले जानकारी दिए ।मुगुका प्रजिअ महतले भने, “शवहरूलाई जिल्ला अस्पताल मुगुमा राखिएको छ। घाइते १६ मध्ये १३ जनालाई हेलिकोप्टरमार्फत् नेपालगञ्ज पुर्याइएको छ।”
सुर्खेतबाट मुगु सदरमुकाम गमगढी जाँदै गरेको भे १ ख ३१६७ नम्बरको बस मंगलबार दिउँसो पिनागाउँमा दुर्घटना भएको हो। मृतकमध्ये १० जनाको सनाखत भएको छ।
रारा मध्यवर्ती क्षेत्रका अध्यक्ष बलराम साहानीका अनुसार मुगुमा मृत्यु हुनेमा चालक ३५ वर्षीय दानबहादुर रावल, छायानाथ रारा नगरपालिका–७ का १२ वर्षीय आशिष शाही, १३ वर्षीया सुदिक्षा बम, १६ वर्षीय भग बम, वडा नम्बर १ का १८ वर्षीय मञ्जु मल्ल, वडा नम्बर ८ का २२ वर्षीय सरोज बिताली र नविन बुढा छन्।
यस्तै उपचारका क्रममा नेपालगञ्ज मेडिकल कलेजमा मृत्यु हुनेमा छायानाथ रारा–१ का चन्द्रप्रसाद भाम, वडा नम्बर ७ का १२ वर्षीय आदित्यविक्रम शाही र वडा नम्बर ८ का २८ वर्षीय टोपबहादुर विष्ट छन्।
कोहलपुरमा उपचारका क्रममा ज्यान गुमाउने एक जनाको पहिचान नखुलेको बाँकी प्रहरी प्रवक्ता प्रहरी नायव उपरीक्षक मधुसुदन न्यौपानेले जानकारी दिए। उपचारका लागि नेपालगञ्ज लगिएका १६ मध्ये १२ जनाको उपचार भइरहेको न्यौपानेले बताए। घटनास्थलमा मृत्यु भएकामध्ये १६ जना पुरूष, सात जना महिला र १ जना बालक छन्। एक जना बालिकाको भने जिल्ला अस्पताल मुगुमै उपचार भइरहेको छ। उनको अवस्था सामान्य रहेको छ।
बसमा सवारमध्ये तीन जनाले गाडीबाट हाम फालेको र दुई जना दुर्घटना हुनुभन्दा केही समय अघि ओर्लिएको बुझिएको बलरामले बताए। मृतक, घाइते र गाडीबाट हाम फालेर वा पहिले ओर्लिएर बचेकाहरूको संख्या अनुसार गाडीमा ४९ जना सवार रहेको बुझिएको छ।
यद्दपी प्रहरीले दुर्घटनास्थल भीरमा खोजी गरिरहेको जनाएको छ। शव जिल्ला अस्पतालमा राखिएको र पोष्र्टमाट गरेपछि आफन्तको जिम्मा लगाइने प्रहरीले जनाएको छ।
