यामानाशी, जापान (एजेन्सी) । जापानको यामानाशी प्रिफेक्चर अन्तर्गत उएनोहारा र ओत्सुकी शहरको सीमामा पर्ने ओगिमायामा पहाडमा लागेको डढेलो नियन्त्रण बाहिर गएपछि स्थानीय प्रशासनले उच्च सतर्कता अपनाएको छ। गत ८ तारिखदेखि सुरु भएको डढेलो १० तारिख बिहानसम्म पनि जारी रहेको र बस्ती नजिकै पुगेको समाचार प्राप्त भएको छ।
बस्तीभन्दा ५० मिटरको दूरीमा आगो दमकल विभागका अनुसार, हावाको वेगका कारण आगो कम्तीमा ९ ठाउँमा फैलिएको छ। डढेलो पहाडको फेदीमा रहेका मानव बस्तीभन्दा मात्र ५० मिटर नजिक पुगेपछि त्रास फैलिएको थियो। हालसम्म कुनै मानवीय वा भौतिक क्षति नभए पनि सुरक्षाका लागि ओमे जिल्लाका ७६ घरधुरीका १४३ जनालाई सुरक्षित स्थानमा जान (Evacuation Instruction) निर्देशन दिइएको छ।
सेना र हेलिकप्टर परिचालन आगो निभाउनका लागि जापानको आत्मरक्षा बल (Self-Defense Forces) र दमकल टोली परिचालन गरिएको छ। ९ तारिखमा स्थल सेनाका ७ वटा हेलिकप्टरहरू (CH47 र UH1) प्रयोग गरी आकाशबाट पानी खन्याउने काम गरिएको थियो। १० तारिख बिहान ८ बजेदेखि पुनः हेलिकप्टरमार्फत निभाउने कार्य सुरु गरिएको छ। राति बस्तीमा आगो छिर्न नदिन दमकलकर्मीहरूले घरहरू नजिकै पाइपहरू जडान गरी विशेष निगरानी राखेका छन्।
डढेलोको कारण: मानवनिर्मित लापरवाहीको आशंका आगोको मुख्य स्रोत पहाडी पैदल यात्रा मार्ग (Hiking Trail) नजिकै रहेको बेन्चहरू राखिएको ठाउँबाट सुरु भएको पाइएको छ। उक्त स्थानमा सामान्यतया आगो लाग्ने कुनै प्राकृतिक स्रोत नभएकाले कसैले फालेको चुरोटको ठुटा वा पिकनिकका लागि बालिएको आगोबाट डढेलो फैलिएको हुन सक्ने प्रहरी र दमकल विभागको अनुमान छ।
सुख्खा मौसमले चुनौती यस क्षेत्रमा लामो समयदेखि वर्षा नभएका कारण जमिन र हावा निकै सुख्खा छ। उएनोहारा शहरमा गत महिनाको २५ तारिख यता १ मिलिमिटर पनि वर्षा भएको छैन। ओत्सुकी शहरमा पनि यस महिना वर्षाको मात्रा अत्यन्तै न्यून रहेकाले आगो छिटो फैलिएको मौसम विभागले जनाएको छ।
स्थानीयको गुनासो फेदीमा बस्ने एक ७० वर्षीय वृद्धले भने, “यो पहाडमा आगो लाग्ने कुनै स्रोत छैन, यहाँ डढेलो लाग्नु सामान्य कुरा होइन।” अर्का एक स्थानीयले बस्ती नजिकै आगो आएका कारण रातभर सुत्न नसकेको बताएका छन्।
दमकल विभागले “तत्कालै घरहरूमा आगो सल्किने अवस्था नभए पनि सावधानी अपनाउन आवश्यक रहेको” भन्दै स्थानीयलाई सतर्क रहन आग्रह गरेको छ।
