टोकियो, जापान ।
जापानको राजधानी टोकियोस्थित विश्वप्रसिद्ध तोयुसु माछा बजारमा आज बिहान भएको नयाँ वर्षको पहिलो लिलामीमा एउटा ‘ब्लूफिन टूना’ माछा अहिलेसम्मकै सर्वाधिक मूल्यमा बिक्री भएको छ।
कीर्तिमानी मूल्य र तौल बजारमा ल्याइएको २ सय ४३ किलोग्राम (Kg) तौल भएको उक्त विशाल ब्लूफिन टूना ३२ लाख अमेरिकी डलर(नेपाली विनिमय दर अनुसार करिब ४६ करोड ३२ लाख रुपैयाँ) मा बिक्री भएको हो। यो मूल्य माछाको इतिहासमै हालसम्मको सर्वाधिक मानिएको छ।
को हुन् खरिदकर्ता? जापानी परिकार ‘सुशी’ का पारखीहरूमाझ लोकप्रिय चेन रेस्टुराँ ‘सुशी जान्माई’ सञ्चालन गर्ने कम्पनी कियोमुरा कर्पोरेसनले यो माछा खरिद गरेको हो। कम्पनीका अध्यक्ष कियोशी किमुरा, जसलाई जापानमा ‘टूना किङ’ (Tuna King) को उपनामले चिनिन्छ, उनले नै यो कीर्तिमानी मूल्य कबुल गरेका हुन्।
“पहिलो टूनाले भाग्य ल्याउँछ” समाचार संस्था क्योदोका अनुसार, महँगो मूल्य तिरेपछि प्रतिक्रिया दिँदै अध्यक्ष किमुराले भन्नुभयो, “वर्षको पहिलो टूनाले भाग्य लिएर आउँछ।”
किमुराले हरेक नयाँ वर्षको पहिलो लिलामीमा चर्को मूल्य तिरेर उत्कृष्ट टूना माछा किन्ने परम्परा नै बसालेका छन्। उनले यसअघि पनि पटक-पटक लिलामीमा कीर्तिमान कायम गरिसकेका छन्।
ग्राहकलाई सुशीको स्वाद लिलामीमा जितेको उक्त विशाल माछालाई आजै सुशी जान्माईका रेस्टुराँमा लगिएको छ। त्यहाँ उक्त माछालाई काटेर टुक्रा पारी (Fillet) ग्राहकहरूलाई ताजा र उत्कृष्ट सुशीका रूपमा पस्किने योजना रहेको कम्पनीले जनाएको छ। जापानभर र विदेशमा समेत सुशी जान्माईका अनेकौँ शाखाहरू रहेका छन्।
जापानमा नयाँ वर्षको पहिलो टूना लिलामीलाई शुभ साइत र प्रतिष्ठाको विषय मानिन्छ, जसले वर्षभरिको व्यापारमा राम्रो प्रभाव पार्ने विश्वास व्यवसायीहरूमा रहेको छ।
