टोकियो, जापान । जापानमा आइतबार सम्पन्न ५१औँ प्रतिनिधि सभा (तल्लो सदन) निर्वाचनको मतदान लगत्तै सार्वजनिक भएको एक्जिट पोलले सत्तारूढ लिबरल डेमोक्रेटिक पार्टी (एलडीपी) ले ऐतिहासिक जित हासिल गर्ने देखाएको छ। असाही सिम्बुनले गरेको सर्वेक्षण अनुसार एलडीपीले निर्वाचन अघिको १९८ सिटबाट ठूलो फड्को मार्दै ३०० भन्दा बढी सिट जित्ने सम्भावना देखिएको छ।
एलडीपी र उसको गठबन्धन साझेदार जापान इनोभेसन पार्टी (इसिन) को सिट सङ्ख्या जोड्दा सदनको दुई तिहाइ अर्थात् ३१० सिट नाघ्ने प्रबल सम्भावना छ। जापानी संसदीय व्यवस्थामा तल्लो सदनमा दुई तिहाइ बहुमत हुनुको अर्थ सरकार निकै शक्तिशाली हुनु हो। यस्तो अवस्थामा माथिल्लो सदनले कुनै विधेयक अस्वीकृत गरे पनि तल्लो सदनले त्यसलाई पुनः पारित गरेर कानुन बनाउन सक्ने विशेषाधिकार राख्दछ। एलडीपी एक्लैले पनि २३३ सिटको सामान्य बहुमत सजिलै पार गर्ने देखिएको छ, जुन किसिदा प्रशासन यता (सन् २०२१ अक्टोबर) पहिलो पटक कुनै एक दलले स्पष्ट बहुमत ल्याउन लागेको हो।
अर्कोतर्फ, प्रमुख प्रतिपक्षी कित्तामा भने ठूलो धक्का लागेको छ। कन्स्टिच्युसनल डेमोक्रेटिक पार्टी र कोमेइतो मिलेर बनेको नयाँ दल ‘सेन्ट्रिस्ट रिफर्म युनियन’ (मध्यमार्गी सुधार सङ्घ) को नतिजा निकै निराशाजनक देखिएको छ। निर्वाचन अघि १६७ सिट रहेको यो शक्तिको उपस्थिति आधाभन्दा बढी घट्ने र अझ तल झर्न सक्ने अनुमान गरिएको छ। डेमोक्रेटिक पार्टी फर द पिपुल्स र कम्युनिस्ट पार्टीको अवस्थामा खासै परिवर्तन देखिएको छैन।
यसपटक साना तथा नयाँ दलहरूको नतिजा मिश्रित देखिएको छ। दक्षिणपन्थी दल सान्सेइतो र ‘टिम मिराई’ ले अप्रत्याशित रूपमा राम्रो प्रदर्शन गर्दै दर्जनभन्दा बढी सिट जित्ने सम्भावना छ। तर, रेइवा सिन्सेनगुमी लगायतका अन्य साना दलहरूको सिट सङ्ख्या भने घट्ने देखिएको छ। आइतबार देशका विभिन्न भागमा भएको भारी हिमपातका कारण केही स्थानमा भने एक्जिट पोल सर्वेक्षण गर्न नसकिएको समाचार संस्थाले जनाएको छ।
