जापानमा विदेशी नागरिकलाई विपद् सूचना प्रवाह गर्न चुनौती: भूकम्प र सुनामी चेतावनीपछि प्रभावकारी सञ्चारको खाँचो

टोकियो। हालै उत्तरपूर्वी जापानको समुन्द्रमा गएको ७.५ म्याग्निच्युडको भूकम्पले जापानमा रहेका विदेशी नागरिकहरूलाई सुरक्षा सुझाव तथा उद्धारसम्बन्धी जानकारी प्रभावकारी रूपमा उपलब्ध गराउनुपर्ने आवश्यकतालाई उजागर गरेको छ।

जापानमा विदेशी पर्यटकहरूको सङ्ख्या कीर्तिमानी रूपमा बढिरहेको सन्दर्भमा, मौसम एजेन्सीले होक्काइडोको प्रशान्त तट र आओमोरी तथा इवाते प्रिफेक्चरका लागि सुनामीको चेतावनी जारी गरेपछि स्थानीय र विदेशी पर्यटकहरू दुवैलाई सुरक्षित स्थानमा जान आग्रह गरिएको थियो।

सूचना पाए पनि कहाँ जाने भन्ने अलमल

फिलिपिन्सका जोसे सान जुआन, जो भूकम्पको समयमा साप्पोरोको एक होटलमा बसिरहेका थिए, उनले आफ्नो स्मार्टफोनमा भूकम्पको अलर्ट पाए तापनि कहाँ जाने भन्ने थाहा नभएकाले सुरक्षित स्थानमा जान सकेनन्।

ह्योगो विश्वविद्यालयको विपद् प्रतिरोधात्मकता तथा सुशासन विभागकी प्राध्यापक मायुमी साकामोटो ले भनिन्, “सुरक्षित स्थान (Evacuation Place) जस्ता जानकारीहरू आवश्यक परेको समयमा विदेशीहरूलाई उचित रूपमा पुर्‍याइँदैन।”

होक्काइडोको जेआर इन हाकोडातेका एक कर्मचारीका अनुसार, जब त्यस क्षेत्रमा जापानको ७-स्केलमध्ये ५ तीव्रताको भूकम्प गयो, तब होटलमा धेरैजसो पाहुनाहरू विदेशबाट आएका थिए। होटलले जापानी र अंग्रेजी दुवै भाषामा पाहुनाहरूलाई सुनामीबाट बच्नका लागि माथिल्लो तल्लाहरूमा सर्न निर्देशन दिएको थियो, तर अलमलमा परेर केही पाहुनाहरू पहिलो तल्लाको लबीतर्फ झरेका थिए।

हाकोडातेकै अर्को आवासगृहमा विपद् सम्बन्धी जानकारी ह्वाइटबोर्डमा टाँगिएको थियो, तर त्यो जापानी भाषामा मात्र थियो। त्यहाँ रहेकी दक्षिण कोरियाली महिला पाहुनाले उक्त जानकारीको तस्बिर खिचेर अनुवाद गर्ने एपको प्रयोग गरी कोरियन भाषामा बुझ्ने उपाय निकालिन्।

बहुभाषी प्रणालीको आवश्यकता

जापान नेशनल टुरिज्म अर्गनाइजेसनको तथ्याङ्कअनुसार, गत वर्ष जापानमा विदेशबाट आउने पर्यटकको सङ्ख्या कीर्तिमानी ३ करोड ६८ लाख ७० हजार पुगेको थियो, र यस वर्षको अक्टोबरसम्ममा यो सङ्ख्या ३ करोड ५५ लाख ४० हजार पुगिसकेको छ।

विदेशी पर्यटकहरूको यो बढ्दो सङ्ख्यालाई ध्यानमा राख्दै प्राध्यापक साकामोटोले भनिन्, “जापानले विदेशीहरूलाई महत्त्वपूर्ण जानकारी सहजै उपलब्ध गराउनका लागि द्रुत रूपमा प्रणाली विकास गर्नु आवश्यक छ।”

उनले विशेष गरी विदेशी पर्यटकहरूलाई उनीहरूको आगमनसँगै बहुभाषी एप र वेबसाइटहरू मार्फत अत्यावश्यक सूचनाहरू सहजै उपलब्ध गराउन सकिने व्यवस्था मिलाउन सुझाव दिएकी छन्। जापानले अब विपद्को समयमा सबै नागरिक र पर्यटकहरूलाई समान रूपमा सुरक्षित महसुस गराउनका लागि बहुसांस्कृतिक सञ्चार प्रणालीमा सुधार गर्नुपर्ने आवश्यकता यस घटनाले औंल्याएको छ।© KYODO