टोकियोको उएनोमा बिहीबार साँझ ४२ करोड येनभन्दा बढी नगद लुटिएको छ, जसको केही घण्टापछि हानेदा विमानस्थलमा भएको अर्को आक्रमणसँग पनि प्रहरीले सम्बन्ध रहेको दाबी गरेको छ।
प्रहरीका अनुसार उएनोको सडकमा सुटकेसमा नगद बोकेर हिँडिरहेका पाँच जनाको समूहमाथि लुटेराहरूले ‘पेप्पर स्प्रे’ छर्किएर करिब ४२ करोड ३० लाख येन (२७ लाख ५० हजार डलर) लुटेर फरार भएका थिए। त्यसको केही घण्टापछि, हानेदा विमानस्थलमा करिब १९ करोड येन बोकेको अर्को समूहमाथि पनि सोही शैलीमा स्प्रे प्रयोग गरी आक्रमण भएको थियो। यद्यपि, विमानस्थलको घटनामा भने लुटेराहरू रकम नलिई भाग्न सफल भएका थिए।
पीडितहरूले आफूहरू मुद्रा सटही (मनी एक्सचेन्ज) व्यवसायमा संलग्न रहेको र उक्त ठूलो परिमाणको नगद चीन र हङकङ पठाउनका लागि लैजाँदै गरेको बयान दिएका छन्। दुवै घटनामा लुटेराहरूले सुटकेस र पेप्पर स्प्रेको प्रयोग गरेको हुनाले प्रहरीले यो एउटै संगठित गिरोहको काम हुन सक्ने आशंका गरेको छ। हङकङमा समेत हालै जापानी नागरिकहरू लुटिएको सन्दर्भमा यो घटनालाई अन्तर्राष्ट्रिय मुद्रा ओसारपसार र आपराधिक सञ्जालसँग जोडेर हेरिएको छ।
टोकियो प्रहरीले फरार अपराधीहरूको खोजीका लागि सुरक्षा व्यवस्था कडा पारेको छ भने सिसीटिभी फुटेजका आधारमा अनुसन्धान अघि बढाएको छ। ठूलो मात्रामा नगद ओसारपसार गर्ने व्यवसायीहरूलाई लक्षित गरी भएका यी शृंखलाबद्ध आक्रमणले जापानको सुरक्षा व्यवस्थामा नयाँ चुनौती थपेको छ। प्रहरीले यस्ता संवेदनशील कार्य गर्दा उच्च सावधानी अपनाउन र सकेसम्म विद्युतीय माध्यमबाट कारोबार गर्न व्यवसायीहरूलाई आग्रह गरेको छ।
