टोकियो, जापान, नेपाली युवा पुस्तामाझ अत्यधिक लोकप्रिय गायक तथा संगीतकार सज्जनराज वैद्य पहिलो पटक जापानमा आफ्नो सांगीतिक प्रस्तुति दिन आउने भएका छन्। आगामी २०२६ मार्च १० तारिखका दिन टोकियोको प्रसिद्ध योयोगी नेशनल स्टेडियममा ‘सज्जनराज वैद्य लाइभ कन्सर्ट’ आयोजना हुने निश्चित भएको छ।
ऐतिहासिक हलमा पहिलो नेपाली कार्यक्रम
टोकियोको हाराजुकु स्टेशनबाट मात्र ३ मिनेटको दुरीमा रहेको योयोगी नेशनल स्टेडियममा पहिलो पटक नेपाली कलाकारको सांगीतिक कार्यक्रम हुन लागेको हो। करिब ४ हजार सिट क्षमता भएको यस स्टेडियमलाई कन्सर्टका लागि उपलब्ध गराउन आयोजकले विगत एक वर्षदेखि निरन्तर प्रयास गरिरहेका थिए।
जिएमटी इन्टरनेशनलको आयोजना
जिएमटी इन्टरनेशनल (GMT International) को मुख्य ब्यानरमा हुन लागेको यस कन्सर्टका लागि नेपालबाट सज्जनराज वैद्यको ब्याण्डसहित एक दर्जनभन्दा बढी कलाकार र प्राविधिक टोली जापान आउने भएका छन्। टोकियोको मुख्य कार्यक्रमबाहेक नागोया, फुकुओका र ओसाका सहरमा पनि कन्सर्ट गर्ने तयारी भइरहेको बुझिएको छ।
विश्व भ्रमणपछि पहिलो पटक जापानमा
सज्जनराज वैद्यले यसअघि बेलायत, अमेरिका, क्यानडा, अष्ट्रेलिया, दुबई, दोहा र भारतका विभिन्न सहरहरूमा भव्य कन्सर्टहरू सम्पन्न गरिसकेका छन्। अन्तर्राष्ट्रिय स्तरमा चर्चा कमाएको यस ब्याण्डको जापानमा हुन लागेको यो पहिलो सांगीतिक यात्रा हो, जसलाई लिएर यहाँ रहेका नेपाली युवाहरूमा निकै उत्साह देखिएको छ।
टिकट बुकिङ र उपलब्धता
मार्च १० मा हुने यस ऐतिहासिक कन्सर्टको टिकट बिक्री अङ्ग्रेजी नयाँ वर्ष २०२६ को सुरुवातसँगै अनलाइनमार्फत खुला गरिने आयोजक स्रोतले जनाएको छ।
